Qendra Shkollore Private "Aga Xhite" në Ferizaj është Kolegj i parë privat arsimor i liçensuar me Vendimin e Ministrisë së Arsimit, Shkencës dhe Teknologjisë të Kosovës. Në kuadër të këtij kolegji, në vitin shkollor 2003/2004, mësimi do të organizohet për:

1. klasën IX orientuese,
2. klasën X të shkollës së mjekësisë me drejtimet:
   - teknik i dhëmbëve,
   - teknik fizioterapeut dhe
   - teknik i farmacisë (kozmetikë),
3. klasën X të gjimnazit matematikor me teknologji informative.

Ky kolegj mëton të organizohet si institucion i përshtatshëm për mësim në përputhje me parimet pedagogjike të implementuara në Kurrikulumin e ri të Kosovës (tërësia e planprogrameve, teksteve etj.). Në këtë mënyrë kolegji do të sigurojë:

• mësimdhënie dhe nxënie, që do të përqëndrohen në dimensionin arsimor edhe në dimensionin edukativ. Kjo nënkupton që ky kolegj do të ofrojë edhe dituri edhe mjedis të përshtatshëm për zhvillimin e vlerave njerëzore, të qëndrimeve e shkathtësive të të rinjve, në mënyrë që njohuritë e përvehtësuara t`i shfrytëzojnë e zbatojnë në situata të ndryshme të jetës për mirëqenien vetjake dhe shoqërore;
• kulturë të re organizative dhe menagjim modern, që do të vehen në shërbim të arritjeve më të mira në mësim dhe arsimim të nxënësit, i cili do të sjellet e veprojë si pjesëmarrës i një shoqërie të lirë e demokratike siç synon të jetë shoqëria kosovare;
• kultivim të identitetit lokal, etnik e kombëtar të nxënësit dhe aftësim për pasurim të identitetit, të tij personal, duke i njohur vlerat e familjes, traditat dhe kulturën e popullit, por edhe të komuniteteve e të popujve të vendeve tjera. Në këtë drejtim, Kolegji, nxënësit do t`i hapë një perspektivë internacionale shumëkulturore në të gjitha aspektet e jetës;
• shfrytëzim në mënyrë krijuese të diturive e shkathtësive në sutuata të ndryshme e kontekste të reja dhe të menduar të pavarur e kritik;
• zhvillim të përgjegjësisë së nxënësit ndaj vetes, ndaj të tjerëve, ndaj mjedisit dhe ndaj shoqërisë;
• aftësim të nxënësit që diturinë teorike ta lidhë me veprimtaritë praktike, për dobi të shoqërisë dhe mjedisit, si dhe ndërgjegjësim e kuptim përgjegjësie për të marrë iniciativa;
• ndihmë nxënësit për të zhvilluar vetëbesim dhe motivim pozitiv në dobi të interesit personal dhe të shoqërisë, si dhe t'i shfrytëzojë të drejtat e veta;
• përgatitje të nxënësit për orientim të mëtejshëm akademik e profesional, duke e ndihmuar që të realizojë interesimet e tij personale sa i përketë nxënies dhe aspiratave e interesimeve të tij;
• angazhim të nxënësit për më tepër nxënie të gjuhës angleze, si gjuhë e parë e huaj, për të komunikuar mirë me gojë dhe për të kuptuar porosi të shkruara, si dhe për të zbatuar shkathtësitë në të shkruar. Për këtë qëllim nxënësi do t'i nënshtrohet një programi intensiv të anglishtes. Kjo do t'i ndihmojë që në vitet vijuese të mund të ndjekë mësimet në një numër lëndësh edhe në gjuhën angleze;
• dhënie njohurish nxënësit edhe nga gjuha gjermane, si gjuhë e dytë e huaj, dhe atë deri në shkallën e komunikimt të mirë me gojë dhe për të kuptuar porosi të shkruara;
• dhënie njohurish nxënësit për zotërim solid të gjuhës amtare (letrare standarde), të historisë kombëtare dhe të asaj botërore; të qytetërimit demokratik; të teknologjisë informative për shfrytëzim dhe përpunim të informacioneve; për mbrojtje të mjedisit; për mirëqenien e tyre fizike, duke praktikuar ushtrime të rregullta fizike dhe sporte;
• ndihmë të vazhdueshme që nxënësi të përforcojë aftësitë e veta gjatë punës individuale dhe në grupe;
• dhënien e këshillave lidhur me orientimin e nxënësit dhe aspiratat e tij akademike e profesionale.

Në Qendrën Shkollore Private "Aga Xhite" janë siguruar kushtet optimale për punë edhe sa i përketë objektit shkollor dhe lokale ndihmëse ( ndërtim i ri), edhe sa i përketë personelit arsimor (me tituj universitarë) dhe përvojë të begatshme pune në lëmin e mësimdhënies; kabinete të paisura me aparate, mjete mësimore dhe paisje tjera për konkretizimin e mësimit.

QSHP "AGA XHITE" i siguron nxënësit:

• uniformë shkollore,
• mbikëqyrje të vazhdueshme shëndetësore,
• polisën e sigurimit të nxënësit,
• transport për vijuesit nga Prishtina,
• qasje në internet pas orarit të mësimit dhe
• mundësi këmbimi me kolegje nga Global College Network me seli në Londër,

Drejtori i Qendrës
Mujë Berisha, prof.